Sipwe nenengeni pwan ew ekiek mei murino faniten feifeitan manawen souneng.
Iei ren: "Anomu Kapasen Kot non ekiek ika netip."
Non puken Efisos 6:17 a apasa pwe ewe Kapasen Kot a usun efoch ketinas. Epwe pwata Paipel e nounou ei fos ika ei kapas, ketinas?
Kapasen Kot mei ken mi pwan tongeni nieno tipis. Mei tongeni epwe awenewen ngeni ekiek me netip, an epwe pwari masowen ekiek me netip (Ipru 4:12). Non angangen maun, a pwa (2) ru auchean ei mettoch ketinas. Aewin, mei tongeni epwe ew pisekin eppet. Oruwan, a tongeni epwe pwan ew pisekin afeiengaw (Matt. 4:1-11). Non om pipisek Kapasen Kot me pwan non om ka kuna manamanan, om tufichin weweiti Kapasen Kot me om pworacho ngeni tipis epwe wateno (Ipru 5:14).
Iwe pwan ew, me nom non uruwon fonuwen Rome me ekkewe ekkoch fonu, ei pisek ketinas pwan ew pisekin ninino chokewe chon foforingaw, usun chok ewe mettoch irapenges (Matt.26:52,Rom.13:4). Non uruwo sia sinei pwe Paul a kuna ninino ren ketinas. Ew pisekin mano- pisekin ninni.
Ina popun ika en emon mei mochen kopwe nieno tipis non manawan, you need God's Word. Watiw sonuk met pusin om (2 Kor. 10:4) iwe ka angei mine an Kot, ewe Ketinasen Ngun (Efisos 6:17). Chechemeni pwe ei maun ew maunen ngun, nge anen om nieno tipis a tufich seni Kot Ngunmifen (Rom. 8:13). Ese wor om tufich non om maun ngeni tipis, nge non manamanen Kot Ngunmifen ka tongeni pworaiti, okufu, nieno tipis.
Kapasen Kot mei tufich non mettoch meinisin faniten manawen om souneng. Iei ew pisekin maun me pisekin manaw mei fokkun auchea. Ewe Ngunmifen a makkei (I Pet.1:21), a wanong manaman non (I Thess.1:5), nge a pwan pusin awewei (2 Pet.1:20). Seni Kapasen Kot ka tongeni pworaiti me nieno tipis.
Iwe faniten Kapasen Kot a men watte auchean me namwotan, om kesapw afani me anea ew watten osupwang ngonuk.
Pusin ekieki nenien Kapasen Kot non manawen emon souneng. Puken Kol Fel a poputa won (2) ru sokkun aramas. Ewe mi fot non kapasen Kot me ekewe ir chon turunufos (Kol Fel 1:2-3). "Nge ra pwapwaiti an ewe Samol mi lapalap alluk o ekieki usun leran me lepwin. Atekewe ra wewe ngeni ira mi mar unukun ekewe chan pupu ra ua fansoun ras, nge chor resapw aiolol" (Kol Fel 1:2-3). A pwan mak non chok puken Kol Fel, "Epwe ifa usun an emon alual tumunu manawan pwe epwe limoch? Ei a chok fis ren an aneasochisi om kapas" (Kol Fel 119:9). Wokisin 11 a apasa: "Uwa iseis om kapas non letipei pwe usapw chuen tipis ngonuk."
Ifa usun manawom? Mei wewe ngeni efoch ira mei mar unukun konik? Mei nimeoch manawom? Ach pwapwaiti, ekieki usun, isoni, me aneasochisi Kapasen Kot ina met a aimufeseni io mei nieno tipis me io ir mei chuen nom fan manamanen tipis.
Kese tongeni kopwe emenungaw seni Kapasen Kot ika pwe en mei mochen mar non manawen om souneng. "Oupwe usun chok ekkewe monukol mi upufo, fansoun meinisin oupwe fokkun monneiti ewe chonun oup mi wewe ngeni Kapasen Kot esapw nofit ngeni och, pwe ren ami un oupwe mamarita o kuna manaw." (1 Pet. 2:2)
Kapasen Kot a namot o auchea faniten afalafal, emirit, epung, kait pwe sipwe tongeni manaweni manawen pung (2 Tim. 3:16-17).
Om fotuki manawom non Kapasen Kot ew angang mei fokkun murino. A tongeni fori pwe kopwe
1. Uu pwos non om apinukunuku ewe Porous Allim (1 Jon. 1:9; 2:1)
2. Kuna Ningeochun Kraist (Fil.2)
3. Weweiti eriaffoun ewe Ekkei Ese Much (Matt.5:29-30)
4. Afota om ekiek Nang (2 Tim. 4:8)
5. Oput tipis (Ipru 3:12-13).
6. Tipepos ngeni Tipen Kot (Eph. 5:17).
7. Chechemeni An Pwon fanitom (Kol Fel 46:1).
Iei popun mut ngeni Kapasen Kot epwe amasowa, epochokuna me nemeni om ekiek me netipom.