Ran Anim.
Kinisou ren om fansoun. Ika en emon mei fifiti kich seni chok nepoputan ach ei kaeo, iwe a iei saingon lesson non ach ewe itenap ika kinikinin kaeo: Nieno Tipis.
Non ach sipwe chok ekis manapei masowen ekewe ran ra no. Nieno tipis mei pesepes seni Kapasen Kot. Kich souneng meinisin sipwe sinei pwan weweit pwe iei pwan ew ach sekening non manawach, usun met a mak non Kolosse 3:5. Wisach pwe kich sipwe amanoi tipis me non manawach. Nge Kapasen Kot a pwan pusin afata ngeni kich pwe kich chon nipwakingaw ngeni ei angang (Rom 8:13). Pwe Kot epwe wisen etufichi souneng meinisin ir mei wanong ar apinukunuk non Kraist (Jon 15:5).
Iwe ikei ekewe lessons sia kaeo fengen:
1. Kopwe Sinei Neniom Non Kraist. Ka fiti Kraist non an mano me manawsefan. An pworachoiti tipis a pwan om. An win pwan om win. Ka tongeni kuna ngas seni tipis.
2. Echika Tipis Amongoni Pung. Watiw senuk angangen tipis. Wata wom fofor mi eoch. Faniten en emon noun Kot mei kefin seni chok nom, wes me fori ika manaweni tipis.
3. Anomu Kapasen Kot Non Netipom. Mut ngeni Kapasen Kot epwe nemeni om ekiek. Mut ngeni epwe asarama om ekiek. Anea Kapasen Kot, fori ika aneasochisi met a apasa.
4. Iwe iei ei last step:Amonata Ngeni Maun.
Faniten ka sinei wisom emon souneng kopwe nieno tipis. Faniten om ka pwan sinei neniom non Kraist. Ka sinei pisekum pisekin maun, iwe iei sipwene kaeo fengen usun ach maun ngeni tipis.
1. Kopwe Tumuneochu Manawom, Achocho Iotek. Non angangen maun, mei wor sounfiu ra wisen mamasa chiechier nepwin nupwen fansoun ra meur. Emon chon mamasa epwe meur seni an angang, mei tongeni afeiengawa chiechian kewe sounfiu. Wisan epwe kaeo an epwe kuna mwitir fansoun ra war ekewe repwe maun ngeniir. Nge epwe pwan sine an epwe apioni fetanei pwe ekewe aramas non ena teninimw ika fen pwan chiechian kewe sounfiu repwe monneta. Nupwen fansoun meinisin repwe mongo ii esapw mongo, epwe chok nikitiw ne mamasa. Nupwen a wor tanecheno ren chiechian sounfiu ii epwe epwe chok monneta. Nupwen ra meur meinisin ii esapw meur. Ika pwe a angangaw non wisan chochon nenian repwe tonong non feiengaw ren (Isikiel 33:3)
Manawen souneng a usun chok manawen ei sounfiu (2 Tim.2:3-4). Aewin, kopwe tumuneoch non manawom usun ewe sounfiu chon mas. Wewen pwe kopwe tumunu fetanin manawom (Efisos 5:15), kepwe aimu senuk met kopwe pusin feiengaw ren nge kopwe pwan monneta ren met sosotun ei fonufan epwe toruk (I Pet. 5:8). Kesapw tongeni kopwe menuki pwe en noun Kot nge kesapw pwan menuki pwe ewe chon otuputup mei arap ngonuk chok an epwe osukosukok. En noun Kraist sounfiu. Masa manawom seni tipis (Kol Fel. 119:9).
Ei ekiek ach sipwe masafichi manawach fan chommong mei riri ngeni ei ekiek iotek. Chemeni nupwen fansoun Kraist a nom non ewe tanipi Kethsemane. A apasa ngeni noun kewe chon kaeo pwe repwe mamasa nge pwan iotek pwe resapw turunong non sosot (Matt.26:41). Chemeni met a fis pwe kewe chon kaeo rese mamasa rese pwan iotek nge ii ra meur. Nge nupwen fansoun sosot a war ra en me su, kuta pusin manawan (Matt. 26:69-75).
Om iotek pwe Kot epwe anisuk non om churi sosot (Matt. 6:13) ew ekiek ese towaw seni manawen pin. Wewen pwe kesapw tongeni kopwe enenia tipis non manawom me om ekiek (Rom. 13:14).
2. Epwe Pwos Om Ekiek. Fan chommong ach maun ngeni tipis iei e fis non ach ekiek. Ach ekiek, ika tupuwach, iei nenien finata mettoch. Om finata tipis ika fen om finata pung a fis non om ekiek. Ewe chon otuputup a maun ngonuk non om ekiek. Iei popun sipwe fiti Paul non mefian ei a mak non puken 2 Corinth 10:5:
"Am aiwa ataieno sokkun namanam tekia meinisin mi eppeti minne am aiwa sinei usun Kot. Am aiwa FOTEKINI iteiten sokkun EKIEK meinisin pwe repwe aneasochisi Kraist."
Ru mettoch ra tongeni repwe fis. Aewin, kopwe fotekini iteiten sokkun ekiek meinsin, ika, oruwan, en kopwe fotek ren sokkun ekiek meinisin.
Iwe, ifa usun ach sipwe appwosa ach ekiek.
1. Kosapw achanu (2 Corinth 4:16).
2. Kesapw eppiru foforun ei fonufan, mut ngeni Kot epwe siwini netipom (Rom. 12:2).
3. Wata om ekiek ren Kraist nge esapw ren mettochun ei fonufan (Col. 3:2).
4. Amochunuku ekewe mettoch mei murino, mei amwarar, minne mei ennet, mi auchea, mi pung, mi nimenimeoch, mi ningeoch, kewe mi wor sufonun (Phil. 4:8).
5. Emiriti inisum ngeni nonomun Kot (1 COrinth 9:25-27).
6. Achocho aninis fengen non angangeni Kot (Ipru 3:12-13).
Ikei ekkoch mettoch epwe tongeni anisi manawom manawen souneng. Kinisou Chapur. Ach iotek pwe kopwe tufich me pochokun non Kraist pwe tipis esapw nemenem non manawom. Kinisou. Kot epwe afeiochuk.