Chommong souneng ra kan chufengen iteiten week faniten Bible study. Ew kapas eis uwa mochen upwe ponuweni, met auchean Bible study? Eni epwe chommong ponuwan meren aramas. Chommong repwe apasa: faniten manawen souneng, ika faniten ach sipwe weweiti kapasen Kot ika fen faniten epwe wor chiechifengen nefinen souneng. Mei pung pwe iei met Kapasen Kot epwe fori ngeni kich nupwen fansoun sia chufengen, sia kaeofengen.
Uwa mochen upwe wato ekkoch ekiek me non nouch Bible an epwe emweni ekiekich pwe sipwe weweiti auchean me kuna feiochun Kapasen Kot nupwen a warar me non manawach.
Kol 19:7-9
"An ewe Samol mi lapalap alluk a fokkun murino, a apochokunasefali letipach.An ewe Samol mi lapalap kait a let, a atipachema ir mi wewemang. An ewe Samol mi lapalap ourour ra pung, ra apwapwai lelukach. An ewe Samol mi lapalap kewe alluk ra fat, ra awora mirit. Ach nuokusiti ewe Samol mi lapalap a murino, epwe nonom feilfeilochok. An ewe Samol mi lapalap pung ra let ir meinisin ra pung."
Me non ei wokisin mi wor (6) kinikinin ekiek ra pwa ngeni kich. (6) statements made about God's word.
Me (6) ekkei ekiek ra poputa fan ei muuten kapas: An ewe Samol mi lapalap... non ititin nge ei chon makkei ekkei wokisin e mochen epwe afata ngeni kich pwe an Kot, esapw an aramas. Bible a feito seni Kot, sapw seni aramas. Fan (6)ei muuten kapas a tou: An ewe Samol mi lapalap, an ewe Samol mi lapalap, an ewe Samol mi lapalap...
Ew me ew kei (6) kinikin ekiek sia tongeni kinietiw non (3) kinikin. Non ew me ew kei kinikinin ekiek a pwa ngeni kich: iten Kapasen Kot (title for God's Word), nonomun Kapasen Kot (characteristic of God's Word), me feiochun Kapasen Kot (blessings of God's Word).
Sipwe nenengeni aewin ekiek:
An ewe Samol mi lapalap alluk a fokkun murino, a apochokunasefali letipach.
Ew title ika iten Kapasen Kot a pwa non ei ew kinikin a apasa: Alluk.
Met alluk? Iei ewe mettoch a kaworeta faniten nonomochun me kinamwen ew me ew fonu. A wor alluk pwe epwe emweni me awena chon ew me ew fonu pwe epwe wor kinamwe. Usun chok, Kot apwan awora alluk pwe epwe emweni me awena noun aramas: souneng. Ifa ena alluk Kot a wato? Iei Kapasen Kot ika paipel. Kapasen Kot a wor ngeni kich pwe epwe awena kich, apungu kich, epwe pwan aiti ngeni kich met mi ngaw sisapw fori me met mi eoch sipwe fori. A aiti ngeni kich met epwe apwapwai netipen Kot me met esapw apwapwai netipen Kot. Ina namoten me auchean alluk ngeni kich. Bible ika Kapasen Kot a pwan ra aiti ngeni kich Allukun Kot.
Iwe nonomun ei Allukun Kot, ena ekiek a apasa: a fokkun murino. Met wewen ei? wewen pwe an Kot alluk mi murino, mei fokkun murino. Ei kapas murino ra angei seni ewe fosun Merika perfect. Nge ei fos perfect a feito seni ewe ekiek me non Hebrew sipwe tongeni awewei ngeni: unuseoch ika complete.
Pwe ina nonomun Kapasen Kot, mei unuseoch, mei complete, nge non unuseochun iwe sia tongeni apasa: a fokkun murino. Kapasen Kot, Allukun Kot mei murino, mei unuseoch. Ese wor terin. Mei unuseoch.
Feiochun ei Allukun Kot mei unuseoch, na ekiek a apasa: a apochokunasefani letipach.
Ena kapas apochokuna me non Hebrew mei pwan tongeni wewe ngeni ekkei ekkoch ekiek: asofo, achikara, ika fen pwan: ekesiwini. Iei ei feioch fanitach. Nupwen sia aneasochisi an Kot Alluk, ei feioch fanitach a apasa: epwe wor pochokunsefan non netip, epwe wor asofosefanin manawach, epwe wor ekesiwin.
Ena kapas letipach non Hebrew a tongeni pwan wewengeni: lelukach, ekiekich, manawach, ika fen pwan ngasangasach. Kapasen Merika e nounou ei kapas soul. chon awewei ei kapas soul ra apasa: inner-being, ika inner-man. Wewen soul, letip ika leluk.
Iwe ifa ena lesson sipwe tongeni kaeo seni ei aewin ekiek?
Allukun Kot mei unuseoch a tongeni asofosefani
manawom.
Fifiti kich non ekan ran mwach ach sipwe sopweino ei kaeo non Kolfel 19:7-9.
Kinisou Kot epwe efeiochuk!