Ika emon epwe kapas eis ngonuk: "ifan ena wis kich souneng sisapw tongeni sipwe tunano." Neman epwe tepetep sokkun ponuwan sipwe wata. Awewe: Anea Kapasen Kot, Aronga ewe Kapas, ika fen achocho fiti fan ika eusening afanafan. Mei pung remw. Kana mettoch meinisin mei pesepes seni Kapasen Kot pwe sipwe fori pwan nikitiw non.
Nge mi wor pwan ew wisach souneng ese watte pekin esikun ika afanafan won. Iei ren ewe mettoch "Nieno Tipis." Neman fitemon neimi resapw tipeew ngeni metei u eani porous. Neman repwe apasa pwe Christ a fen wineni ewe maun ngeni tipis. Neman repwe fen pwan kapas eis ika met ujok namwoten an Christ mano won irapenges ika pwe ina tipis mi chok nemenem? Mei pung. An Christ mano won irapenges a wineni ewe maun ngeni tipis. Nge Paipel mi pesei souneng meinisin pwe repwe pwan eani ei angangen nieno tipis.
Christ a awesi ewe NIWININ tipis me won an ewe irapenges. Kich souneng, ewe niwinin tipis mano esapw chuen ach (Rom. 8:4). Chon nonom non Christ rese chuen nom fan pungun tipis (Rom. 8:1). An Christ mano a pwan uwei seni tipis an pung me nemenem won souneng meinisin. Ach fiti Christ non an mano, esapw chuen kich chon fotek ngeni tipis. Pwe Christ a angei seni tipis an sokkun nemenem meinisin non an manawsefan seni mano (Rom. 6:14; 22). Iwe, ika pwe Christ a awesi ewe niwinin tipis nge a pwan angei nemenem me pung seni tipis, iwe met ujok ena sipwe nieno?
Puken Rom. 8:13 pwan Col. 3:5 ra aiti ngeni kich pwe sipwe fokkun nieno tipis non manawach. Ena kapas eis, ifa usun an emon epwe tongeni nieno tipis?
Fifiti kich non ekan ran mwach pwe sipwe aporousa me eppieta me non Paipel ifa usun ei angangen nieno tipis. Kinisou Kot epwe afeiochuk!