Iwe, ifa usun ach sipwe nieno tipis?
Sia poputa ponuweni ei kapas eis. Nge aewin ponuwan si ponuweni ngeni a apasa: Sinei Neniom Non Kraist Sises. Ika en emon ennetin souneng, neniom ka nom non Kraist. Wewen pwe ka ngaseno seni fan nemenien tipis me an pung. Mei fokkun auchea kopwe weweiti me essina ei ekiek.
Iwe iei oruwan: Echika Tipis, Amongoni Pung.
Sotun mwo anchangei pwe ita ka uta ngeni emon ponuwom oupwene fiu fengen. Nge ka sinei pwe atewe kepwe fiu ngeni mei naf an asoso, unuseoch an training, nge napanon iwe mei pwa pwe ii emon mwan pochokun. Nge epwene ian ika ke sinei pwe kana mettoch meinisin e fis faniten OM nifang ngeni? En ke wisen ngeni an asoso kinamwe me training. Neman ika aramas repwe era pwe en mi umwes pwe ke pusin uwou ngeni ponuwom na tufichin an epwe okkufuk.
Pusin ekieki. Fan chommong kich souneng sia fang ngeni tipis nenian non manawach. Ita ururun ach angang sipwe nieno tipis. Nge sia fen apochokunata non manawach pwe epwe wor an manaman me tufich. Nengeni pwe Kapasen Kot e aiti ngeni kich pwe sisapw mut ngeni tipis epwe warar non manawach. Rom. 13:14: "Nge ami oupwe pwilitalong ach Samol Sises Kraist, o ousap ekieki usun minne epwe apwonueta ekkewe mochenian fitukemi."
En mi weweiti masowen ena wokisin? Ousap ekieki minne epwe apwonueta ekewe mochenian fitukemi. Wewen nge kesapw ekieki, kesapw apwonueta, kosapw apochokuna angangen mochenian fituk non manawom.
Wiwin maun me nom non fonuen Europe iwe rekan pwenieno en teninimw iwe ra pinei anen mongo an esapw tikenong non ewe neni. Iwe chon non ewe neni repwene poputa echik tori fansoun ar ra fangeta. Iei usun ei ekiek Paul a wato nefinach. Echika tipis. Wes me amongoni ngeni met mochenin. Nieno.
Nge ifa usun an emon epwe tongeni echika tipis?
Paul a aiti ngeni kich non Efisos 4:22-32 me Kolosse 3:8-17 usun ei angang. Nge non Kolosse 3:8-10, Paul a makkei:
"Nge iei oupwe chok likitalo ekkeei mettoch meinisin: Chou, Song, ekiekingaw, esit, o kapas mi limengaw seni lon awemi. Ousap kapas chofona lefilemi, pun ouwa fen pwiliti seni kemi ewe aramasen lom me an kewe foffor. O ouwa pwilitalong womi ewe aramas fo, ewe mi wilisefal ngeni tipachem usun chok ununun ewe chon forata ii."
Ach sipwe chok mannapei masowen ekkei wokisin: Isetiw sonuk manawen lom, pwilitalong manaw mi fo. Echika tipis. Amongoni Pung.
- Siwini kapas chofona ngeni kapas mi let.
- Siwini angangen sona ngeni angang achocho.
- Siwini koput ngeni tong me kinamwe.
- Siwini koum ngeni manawen omusano tipisin aramas.
- Siwini namanam tekia ngeni tipetekison.
- Siwini Kirikiringaw ngeni kirekireoch.
Kapasen Kot a mochen aiti ngonuk pwe NON KRAIST Kot a awesi om win me pworacho pwe kopwe tongeni uu ngeni tipis faniten Kraist. Na tufichin finata faniten manawom a nonom remw.
Iwe, ina ew sokkun angangen nieno tipis. Mi chuen wor (2) ruu nusun.
To be continued...