Ach lesson ikenai a feito seni oruwen tetenin ekiek me non wokisin 8. Ach ewe lesson mwan, iwe si kaeo fengen ena aewin tetenin ekiek me non wokisin 8. Ikenai sipwe kaeo fengen oruwen teten.
Non ewe: "Kapasen Kot Ngeni Aramasen Chuuk" iwe a mak:
v.8b An ewe Samol kewe kapas mi wenewen, ra emiriti netipach.
Non ewe: "Paipel Are Testamentin Lom me Testament Sofo" a pwan mak:
v. 8b An ewe Samol mi lapalap kewe alluk ra fat, ra awora mirit.
Non Paipelin Merika (NASB) a apasa:
v. 8b The Commandment of the Lord is pure, enlightening the eyes.
Non NIV: The Commands of the Lord are radiant, giving light to the eyes.
Seni ei wokisin non wokisin 8 sia kuna unungat (3) lesson faniten manawach.
Aewin lesson, non ei wokisin sia sinei ruu (2) "title" faniten paipel. Kana ruu Paipel non fosun Chuuk ra aiti ngeni kich ei:
1. Kapas
2. Alluk
Wewen pwe Kapasen Kot wesewesen chochon an kapas. Ina pwata e iteni: "Kapasen Kot."
Non kei wokisin iwe a pwa pwe ei Kapas, ew puken alluk. Kana paipelin merika re nounou ei fos: command. Wewen alluk. Commands or Commandments.
Mei auchea sipwe esina, afona, ika tumuneochu manawach epwe nom fan nurun ei Kapas ika epwe fetan non nurun ei Alluk. Ika pwe niwinin DUI kanapus me pakking seni aramas, epwe met niwinin ach puratiw an Kot Kapas ika Alluk meren pusin Kot?
Oruwen lesson, non ei wokisin sia kuna ew nonomun ika "characteristic" faniten ei Kapas ika Alluk.
1. Wenewen
2. Ffat
Wewen pwe Kapasen Kot mei kurufat ngeni kich ach sipwe anea iwe sa weweiti met e apasa. Wewen pwe Kapasen Kot mei pwa-eoch masowen non ach sipwe weweiti. Kei ekiek non Kapasen Kot mei fatafateoch ngeni ach kaeo me sinei.
Non an emon epwe kaeo Kapasen Kot, iwe paipel a pusin afata pwe mei fat ika mei wenewen. Ei fos wenewen ese fos faniten Kapasen Kot mei awenewen. Ewer Kapasen Kot mei awenewen, nge non ei wokisin iwe ei fos wenewen e pwari ei ekiek pwe Kapasen Kot mei wen. Kich mi kuna seni nepoputan tori nesopun. Ese wor ekkis epwe mwonono seni kich pwe mei wenewen, mei ffat.
Ew me lein kana paipelin Merika e nounou ei fos: pure. Wewen pwe ese wor ne topwun, mei chok kurufat. Ese wor tikin pwun won. Mei limoch, mei fatafateoch.
Eunungatin lesson, sia kuna me non wokisin ew feiochun ei Kapas ika Alluk mei wenewen o ffat, pwe ew pisekin emirit. Me ruu nouch kei Paipelin Chuuk re nounou ei fos:
mirit.
Mei auchea ititin me non fosun Merika: enlightening the eyes ika giving light to the eyes.
Wewen pwe me mwan iwe kich chon nom non rochopwak, nge seni Kapasen Kot iwe a poputa sukuno ekiekich ngeni netipen Kot. Kapasen Kot a poputa ne emiriti kich.
Iwe, iei pwan ew lesson ika ekiek faniten ach na itenap: Auchean Bible Study...pwe Kapasen Kot kich mei tongeni weweiti pwe mei ffat ika wenewen. Fen pwan ina nenien an Kot Kapas ika nenien mefien ach Samol mi lapalap. Nge napenon, iwe mei awora ach mirit.
Kinisou.
Kot epwe afeiochuk.